ياحروف الشعر شوفي له عذر =يعتذر به عن غيابه ليش طال
عايشٍ بين الحسايف والقهر =ياحروف الشعر قولي له تعال
ياحروف ان كان طاولت الهجر = واعذابك ياحروف من السؤال
ياحروف ان كان عذره بالقدر =ما لنا حيله ولا فيها مجال
بنتصبر لين وضعه يستقر =نبنحاول دام للصبر احتمال
بس انا خايف يكون الهجر هجر =ناويٍ ينهي غرامه والوصال
وقتها يا شين ايام العمر =وقتها فعلا يكون الحظ مال
قالت حروف الشعر والله قهر =بكل عنف وكل نتره وانفعال
قول شالموضوع حاول تختصر =وش تبي اخلص ترى طال السجال
قلت زين شسالفة هذا النتر =ليش نفسك شاينه ممكن سؤال
قالت الموضوع لو مابه جبر =ما اطيعك في قصيده لو خيال
للامانه انت ما عندك نظر =كيف ترخص اصلاً بذاك الغزال
قلت انا ممكن ابي شوية صبر =باشرح الموضوع واعطيك المجال
قالت اسمح لي انا دمي طفر =لا تكابر بالخطا يكفي جدال
لو تعذر من هنا لين الفجر =عذرك اقبح من ذنوبك لو تقال
تجرحه وتقول ما عندي خبر =تهجره وتقول ذا شيٍ محال
مر طعم الهجر والحقران امر =ومن قرصه الداب ذل من الحبال
صحت ياحروفي انا ولد صقر =تجحديني وانتي ادري بالخمال؟
هو صحيح انه بدر نصف الشهر =وهو صحيح انه ملك تاج الجمال
لكن اللي صار ما هو يغتفر =الغرور اعماه يا بنت الحلال
قاطعتني تقول وسع هالصدر =وراجع حروفك وفكر باعتدال
مو على شانك على شان الشعر =واذكر انه مورد الشعر الزلال
يا اخي شف حالتي عقب الهجر =يا خي شف كيف حطمت الخيال
كنت انا ابدع لو تحاول تفتكر =كم قصيده كانت بوصفه جمال
كنت اغرد في وصوفه وافتخر =أني وحيده واحتكر ذاك الدلال
ياخي حطمتني تالي العمر =يوم قررت النهايه للوصال
قلت هاه !! وقالت افهم يا بشر= قلت يعني شلون قالت بالعدال
نبي نقول انه اصيلٍ لو عثر =شاف نفسه من خلال ومن خلال
لو خطاه كبير قدره ما صغر =وانت شاطر بالمهايط والجدال
قلت فيك الخير شوفي له عذر =ياحروف الشعر نادي له تعال