مدري علام النوم عيا يجيني = اليوم لي عاشر وانا كاره النوم
وجدي تفرعن وانفجر به ونيني = والقلب من كثر التنهات مثلوم
عليك ياللي مسكنك نون عيني = هذا وانا ادرى اللوم من عاشق اللوم
ويلاه يالاماك لو ساعتيني = انشهد ان اللي يفارقْك محروم
مازال كفي ينضح الياسميني = يومه بكفك تالي العهد مضموم
للبعد تاثيرن يخل اليقيني = تظهر عليك الشمس والعقل منجوم
قالولي ان البعد سمن دفيني = تبي الصراحه فعلن ، البعد مسموم
اشواة ما في غربتي يا ظنيني = ان الوصل وياك ما هوب معدوم
اليا استضقت وقمت اصفق يديني = حرقتلي كرتين في طارفة يوم
الوصل رغم البعد يروي حنيني = لا صرت انا بالبعد يا شوق ملزوم
للحب منهج يجبر العاشقيني = اخذ وعطى ما فيه بيعن ولا سوم
دامك تحبه ترخص العالميني = ودامه يحبك يترك السوم والقوم
ماهوب صاحب صاحب النيتيني = ولا هوب صاحب كان شكيت به يوم
استر علامات الهوى لا تبيني = مير الهوى فضاح ملعون مذمووم
والحب من بعد الثلاثين شيني = لا صرت في سلم الرجاجيل محكوم
ولا ادري علام النوم عيا يجيني = اليوم لي عاشر وانا كاره النوم