حرمت أهين النفس لايات مخلوق = الظاهر إن الطيب كثره ملاقه
خلاص تبت من العطا ياهل الذوق = الطيب في هذا الزمن صار عاقه
اثري العطا والطيب له حد وحقوق = ماهو سبيلن تتركه للسراقه
لا تسالوني ليش والعلم مفهوق = والشمع ما ينفعك لولا احتراقه
أنا إكتشفت إني بلاعقل مخلوق = ولا جنيت إلا الشقا والحماقه
اثريك لازم تنظر الناس من فوق = حتى يرونك فوق لوهم رفاقه
بعض الملا لو مركزه داخل الموق = يقلع عيونك لجل يعرف نطاقه
وبعض الملا كالحر مربوط بسبوق = لولا سبوقه مسرعن بانطلاقه
إن صرت صادق قيل ساذج ومحقوق = وان صرت طيب قيل خبل بأناقه
لازم تكون انسان متعلم البوق = حتى تجاري ذالزمان وسياقه
من شان تكسب نظرة فلان ويروق = تعاله من تحت بس بلباقه
تصير غالي تصبح انسان مرموق = تسلك امورك لو جلال ودقاقه
ما عاد به صادق ولا فيه مصدوق = ولا عاد به مفهوم اسمه صداقه
واللي خسر بالسوق ما يمدح السوق = ولولا احتكاك الناس ما به علاقه