عذابها / ويلاه م/ اطـْوَل عذابها=نفسي شعاها ما يكـدِّرْ شرابها
الآيمه مار البلا ما تلايمت=بين الضلوع العوج لزَّت حرابها
نفس(ن) عنيده ما تردَّت عزومها= متمرّده واليوم طاول حسابها
وانا على طـَرد الهوى من عرفتها=يالخالدي تصخا ولا ينصخابها
يابن مهنا يا ذرى كل صايحه=لا قامت العدوان تضرس بنابها
يالريف يابن الريف يا مجلي الكدر=يالهيلعي يا شوق زاهي خضابها
ياللي ذراعك يقلط الطيب فوقها=حي الذراع وحي منهو كلى ابها
ربعك محيِّرْت النعامه وبيضها=وانتا محيِّر سيفها مع جرابها
اليا ارتكيتك ما احسّب ميالها=وشلون احسّب وانت بابي وبابها
جيتك وروحي من لظى الشوق تضطرم=والموت يلفح رجلها مع كعابها
يا ونتي ونة خلوج(ن) ترزّّمت=تفرك على الجالين مما صطابها
ذكـّّوا ولدها قدْمَها يوم طشـَّروا=دم الحوار / وقام يكثح ترابها
وإلاّ شجاع(ن) زَلْ / ما زلـّّت القدم=لا ثار ثايرها يعفّت رقابها
تشهد على ضربه سماها وقاعها=وصدور لابوها ولا بو خرابها
اون لـَين الليل كلـَّت مسامعه=ليلي طويل وصبحها ما صحابها
باسباب من حبه تمكن بظامري=ادلى على زرق العروق وسرابها
من مخمص رجولي اليا منبت الشعر=وما بينها والشوق يشعب ركابها
قمت اتصبّر وين انا اليوم والصبر=الاّ نشف ريقي وقصّر لعابها
تِكْثرعلي اللوم / ما كان وانكتب=عذر المسيَّر والمخيَّر قرابها
تدري يابو ضاري وش اسباب علتي ؟=تدري وش اللي ما يداوى صوابها ؟
أني على النيّه واسع(ن) مداخلي= واللي سأل يسأل ويلقى جوابها
وأني عطيت ولا تحريّت ردها= لا غشَّوا الكيله أوفي نصابها
واني اكز الجرح م/ ابديه للملا=يا كثرها يالقرم ما ينحكابها
واني شريت بدم قلبي ومهجتي=وضحيّت باغلى ما امتلك والرجا بها
واليوم كلّ(ن) باع / وانبعت يالخوي=بارخص ثمن واحسرتي واعذابها