ياراكب اللي علاها قش= ددسن جديده ومنقوشه
من الوكاله علاها رش= ماهي قرنبع ومقروشه
شكمانها بالرطوبه بش= وأربع كفرات مفروشه
تهش دعب الخرايم هش= وإليا مشت مشي مخروشه
عن دربها ياخبل إنحش= وخل المسارات مفتوشه
وتحش عشب البراري حش= وخصوص لن جات مجروشه
بمقدمتها دبل ينعش =وبطنها الطعس ماينوشه
ولاهمها الوحل والرش= دايم لها الأرض مبروشه
يشهد لها كل راعي طرش= أو عربجيٍٍ وإله شوشه
ولاجالها طقطقه وقرش= يابان ماهيب مغشوشه
وسواقها للعمامه طش= إنشد هل العقل ودشوشه
مركب غني وبعد مقرش= ولاعانقت ذاك لقروشه
عذراً وتسمع خطاها وقش= تنحب ماهيب مكروشه
إليا أقبلت العصار تنش= ظبيٍ تخوف من الطوشه
وإليا عرضت كالسحاب يبش= وأحياء صراميد معروشه
وإليا أدبرت مثل سبعٍ دش= واقفى بعد خم عرموشه
مهارة أللي نقشها نقش= لاعابت إيداه ونقوشه
نيسان شركه حرام تغش= والماركه غير مخشوشه
يبان تملك كراس العرش= وخبيرها يمس طربوشه
وديكورها يحتمل للنبش= والطاقم الشمس ماتهوشه
ضد الحراراه وضد الهبش= ومراتبه شبه مرشوشه
بأحدث طرازٍ كساها الفرش =من أجمل الخام منبوشه
والطاره اللي تلف بنش= وتهوز من أول النوشه
وطاقم هوائي بمكرة ونش= ونسيمها مطيبك موشه
والطاقم أتقن لزر القرش= غرفه تماتيك مع حوشه
فيها تعلق أنيس ووحش= وذباحه لكل مربوشه
مع كل ريعٍ تجي وتخش= تنقش ماهيب مقشوشه
واللي شتمها بخمسي كش= في وجه من طالت إرموشه
تسبق مفاتيحها بالنتش= تنتش ولاهيب منتوشه
قيمه وسيمه وزاد وعش= وتعيش لو قيل منغوشه
وفالهربده مثل شارب خرش =تمشي ولو كان مخدوشه
تعيش لو الرفارف حرش= والمرتبه بحبل محفوشه
تصبر وتسعى بعيانٍ عمش= كنزٍ مايفنى من اقروشه