قالت لي اوعدني تشيل الكلافه = خل العلاقه بيننا دون تكليف
قلت اوعدك لكن !! شعرت بحسافه = صعبه لساني معك يلغي التكاليف
ويومي وعدت .. القلب زاد ارتجافه = كايد على الخواف تحمل يده سيف
من كثر حبي لك درست اللطافه = وزود احترامك يمنح الوصل تشريف
اعاملك باسلوب دار الضيافه = والمشكله اني شره بضيافة الضيف
لك رمش كل الناس لازم تخافه = ولك ابتسامه كنها نسمة الصيف
بهديك دفتر شعر .. أنتي غلافه = عنوانه اسمك..اسم سيد المواليف
انتي معاني الشعر .. وزنه.. وقافه = يالله عساني فيك مبدي تحاسيف