البارحه شعري رخالي عنانه = واصبحت خيال القوافي والامثال
وابدعت مما صاغ فكري وصانه = ابيات شعرن تلها الجوف بحبال
ياللي وصلك الحرف ثبت مكانه = خله دليلك واترك القيل والقال
من عاش ماله غايتن في زمانه = ما هوب محسوبن مع الناس رجال
والوقت له رمحين غدر وخيانه = احذر رماح الوقت لا صرت خيال
اغنم سنين العمر في مهرجانه = قبل يفوت الفوت وتموت الآمال
حط الهدف بالبال واتعب لشانه = وارخص بغال الروح والعمر بذال
ترى الهدف لو كان صعب امتحانه = يهون لا منك عطيت الهدف بال
لا صار لك بالعقل ثقل ورزانه = يركد لك النيشان لو فوق زلزال
وابحث مع الخلان شخصن تكانه = بالعقل له ميزان تضرب به امثال
واترك صديقن علته في لسانه = لا كافين شره ولا طايب الفال
راع العقل دايم لسانه حصانه = يعرف متى يسكت وراكد اليا قال
والجاهل اللي جوهر العقل خانه = لو كانت سنينه عريضات وطوال
وصون الشرف عن كل عيب ومهانه = وخلك عزيز النفس في كل الاحوال
الرابح اللي عاش مرفوع شانه = واليا مشى ما هوب تايه ولا ذال
والخاسر اللي ما يصون الامانه = لو كان يملك جاه وانعام واموال
الطيب باهل الطيب ذخر وبطانه = والطيب باهل الجحد مي (ن) بغربال
طبيت بحر الشعر واخرجت دانه = وعلقتها نيشان في صدر الاجيال