الله من هم(ن) بقلبي تواهل=هوجس بي من الهواجيس هاجوس
قلبي تخخل من كراسيه وأجتل=وغديت كني بظلمة الحبس محبوس

فأعجبتني قصيدته فأحببت ان اجاريه بهذه القصيده

القلب هاض وهيضه من تمثل=شاعر حكيم وعنده القاف مدروس
سمعت القصيده في شريط تسجل=ساعة سمعته هيظ اكمون وهجوس
يا ليت قافك يمنا كان مرسل=مار اخفي أنه حظنا كان منحوس
يا راكب اللي لغيرها ماتزمل=منوة غريب دونه البعد مدموس
معفاه قبل العام حايل محيل=مانوخت يوم انه الناب مظروس
تاطا الجلد والقف والطعس الادحل=هاك الكتاب وشد والدرب معسوس
تلفي على من له معزه ومنزل=منزالهم بأقصا المعاليق مرموس
للظيف وجهه بالمسره تهلل=والبن الأشقر بالمحاميس محموس
تقلط على طليان جذعات واحيل=بمروبعه تلقى المعاميل والطوس
قله ترى الدنيا كما الشمس والظل=ماقرت ظلال ن ولا قرت شموس
وكان الردي بجموع ماله تبهلل=اللي يعبد المال خاسر ومتعوس
هو ناسي أنه فوقه الترب ينهل=يفنى وماله بالخزازين مدحوس
وماهي غريبه قرب الانذال ينمل=خسيس واحدهم وجمعتهم اخسوس
تلقاه بالنمات يقفي ويقبل=ويعد نفسه بالخطيات فدعوس
جاب النميمه والخطا به تنقل=وصار الخطا من راعي الحس محسوس
نرفا الخطا عن راعي الطيب لو زل=وعمر الخطا مايجبره حكة الروس
ولا كل حلالٍ بالأمثال حلل=سر المعاني في معانيه مدسوس
وبعطيك لغز وبرتجي منك الحل =عندك على فك الطلاميس قاموس
ويش الرهيف اللي من الغمد ينسل=الشمع الأزرق فيه لاصار ملموس
أحد(ن) تدرب فيه واحد(ن) تمجهل=أقسم به الله خالق أعقول وأنفوس

فرد الشاعر معوض بهذه القصيده وقد حل فيها اللغز :

حي الجواب وحي شاعر تمثل=حي الذي شعره بالأمثال منفوس
حي الذي يرفى خويه ليا زل=مادر به غرات ناحس ومنحوس
ماقام في وجه الرفيق يتختل=والنجس من ترثة رزيلين ونجوس
منداني الميلات ولا نقبل الذل=والسيف دون حقوقنا يقطع الروس
واللي تغطرس بالغطاريس يخذل=سبعين قامه تحت الارض مخفوس
واللي غزا في غزوته طاح باحوَل=عدد جواسيسه ثمانين جاسوس
واللي تبرع لأخو مره تزهل=عادت ذلوله صاحب الراي منكوس
راع الذلول اللي مع الناس تهذل=راسه تندح بين غامس ومغموس
من ما توقع للرزاله ترزل=يكبس عليه من الكوابيس كابوس
ورجل(ن) تعمد بالخطايا يتحمل=يصبر على ماجاه والفكر مليوس
هذا الصحيح وكلمة الحق تنفل=طمس الطلامس بالطلاميس مطموس
والدور هذا به مرازيل وشلل=هذا الزمان اللي به الذيب مفروس
من يعترض للناس تلقا به احيل=ومن يقرب الدنسه فلا بد مدنوس
ومن مس للاكرام السبايل توحل=مس الأشده فوقه الحبل ممسوس
فوقه شرابك المحابيل تحبل=يصعب عليه النقض وعقودهن لوس
هذا جوابي لأبن الأجواد مرسل=عنده على كسب النواميس ناموس
عن حل لغزك يافتى ما نتطفل=هذا القلم بين الأناميل ملموس

ولكم الشكر على المرور .. ولكم أجمل التحيات