تعال إجلس ونتناقش مدامنّك عريف القوم = أبي مرّه تقص الحق من دستورك السامي
انا بسألك يومنك تمكّنت وعدانِ اللوم = يجوز إنك تبهدلني وأنا لك معلن اسلامي ؟؟؟
عطيتك لين ما شبهتني (بمحمد المكتوم) = وهبتك لين ما رزّيت فوق البيض الأعلامي
أنا بعرف وشاللي تنتظره يجيك فوق السوم = أبعرف وشتبي دامك ملكت أشواقي وإلهامي
تعبت أحجد هواك وصار حبك بالحشى مقسوم = تعبت أعاند أشواق الضمير العاشق الضامي
تعبت أجنّب دروبك أخاف إنه يجيني يوم = وتفضحني مشاويري لأن العقل بقدامي
تعبت ارفض اشبّه صورتك بالبدر !!. لا مظلوم !!= لأن البدر نور الليل وإنته نور الأيامي
تعبت أزرعلك الصحرا زهور(ن) عطرها مشموم = تعبت أكتبلك أشعاري عجزت وملّت أقلامي
حبيبي ليش أنا بالذات من بدّ البشر ملزوم؟ = أحبك وأتعب بحبك وأعاني لجلك آلامي
وأنا مالي نصيب(ن) في لقاك اللي علي محروم = ولا لي حيلت(ن) كود أبني الآمال باوهامي
حبيبي ليش أنا أتعب بحبك والنتيجه لوم؟= حبيبي ليش أنا محروم وإنته دوم قدّامي؟
ألا وش خانة الدنيا إذا كان الأمل معدوم؟ = ألا وش حيلة العاشق إذا سيف القدر حامي ؟
تعبت أرفض .. تعبت أجحد .. تعبت أعاند المقسوم = وإذا خاب التعب .. خاب الأمل في صحوة احلامي